情侶間嗌起交上嚟,可能乜嘢難聽嘅對白都會講得出口,CG!特別揀出情人間嗌交時最常見嘅對白,加以分析,並提供應用方法,以提升溝通嘅實用性同效用。

1.「你從來都唔XXX(關心、細心etc.)……」

分析:如果講呢句說話時語氣好強硬,形同否定對方一直以來對你嘅好,聽到呢句話,對方個心一定馬上涼咗一截。如果語氣帶點哀怨、委屈,聽起嚟會比較似一個請求,表示想得到多啲關注,對方聽起嚟點都會有啲內疚。

修飾句: 「我最近覺得你好似比較忽略咗我。」

2.「你話我?你自己呢?」、「你自己又好得去邊?」

分析:係以其人之道還治其人之身嘅戰術,通常係感覺自己有錯,於是指出對方嘅錯處,以轉移視線,同時令自己顯得唔係咁無道理。

修飾句:換個講法,意思相同,但對方聽起嚟會比較順耳,例如「呢件事我係有唔啱嘅地方,不過你都有咁咁咁……」

3.「我錯晒啦,好唔好!」

分析:假認錯,係一句狠說話,背後意思就像要切斷溝通橋樑一樣;亦係以退為進策略,因為唔願討論/糾纏,所以求其認錯,將「無理取鬧」嘅標籤貼喺對方額頭上。

拆解法:講出呢句話嘅人並唔係出自真心,佢心入面都係會頂住頂住,過幾日一定會忍唔住同你舊事重提,到時再慢慢同佢「溝通」都未遲。君子報仇,十年未晚啊!如果想講呢句話嘅人係你,你可以用「不如大家冷靜吓先」來代替。
 

4.「我係咁㗎喇,你想點吖?」

分析:呢句話有啲無賴,感覺就似擺明唔當你係一回事;亦有可能係因為明知自己有錯,但死要撐着面子。

拆解法:如果聽嘅一方情緒都好激動,氣氛會急轉直下,大戰一觸即發,到時嘅嗌交真係變成純粹咁嗌,對促進溝通無咩幫助。如果有人對你用呢一招,你都係暫時退下火線好了,無謂浪費彈藥,搵日等對方恢復理智嘅時候先同佢講道理。

5.「如果唔係你XXX,而家又點會YYY?

分析:純粹翻舊賬,令呢場交變得複雜化,專挑對方嘅不是嚟炒作。

拆解法:呢種專向壞處睇嘅攻擊習慣真係要改。好似教小朋友一樣,如果你總係話佢蠢、無用,他就會「如你所願」成為一個真正嘅蠢人。相反,如果對方咁樣話你,你可以提醒對方唔好忽略你做過啱嘅事。

6.「咁分手啦!」、「當初點解會同你一齊?」

分析:帶有威脅意味,通常係自己佔咗下風先講出口嘅意氣說話,十居其九都唔係真係想分開。

拆解法:如果你情急之下講咗呢句話,事後一定要解釋唔係真話。呢句說話好傷感情,唔好咁輕易講出口,如果對方當真或者一口應承就恨錯難返了。

創作者介紹
創作者 happykary 的頭像
happykary

懵Kary的故事

happykary 發表在 痞客邦 留言(0) 人氣()